中學生搞罷課，身為香港家長聯會會長嘅偲嫣BB豈能不表態。噚日拉隊去政總請願，促教育局局長吳克儉跟進學生罷課，嚴格執行《教育條例》，佢指教協要求教師會員支持罷課嘅方式涉嫌違法，甚至連家長簽名同意子女罷課都可能違法！
偲嫣BB俾吳得掂封信共有八點訴求，八方都唔好意思數埋落去，總之偲嫣BB要求吳得掂跟進之餘，仲對吳得掂呢個時候唔喺香港表示非常失望，敕令吳得掂返港後14天內要應機，不得怠慢。吳得掂今次大鑊鳥，俾偲嫣BB追殺，負責接信嘅教局政助施俊輝就幾無辜，俾偲嫣BB稱呼為「施仲輝」。偲嫣BB仲透露佢收到「一千零幾」封家長電郵，問佢學生罷課「點算好」，所以聽日會出動兩架旅遊巴「反對黃色恐怖」，派吓單張同埋「Love No Violence」手帶。