海洋公園主席孔令成處女下海，噚日喺「哈囉喂全日祭香港女童軍愛心慈善日」，第一次扮鬼扮馬，整咗個吸血殭屍造型。佢之前話過唔會好似前主席盛智文咁扮嘢，「但都要支持吓嘅」。下海嘅仲有副主席劉鳴煒，一樣係化行妝扮殭屍。
不過，「殭」都係老嘅辣。做咗海洋公園榮譽顧問嘅盛智文，喺活動尾聲突然出現，仲要先播佢有份參與嘅哈囉喂廣告片，再由熱女郎伴舞咁壓軸出場，都係一身吸血殭屍打扮。
孔主席話盛智文原來病緊但都肯嚟，盛智文就話哈囉喂係佢湊大，一定要嚟撐場，又話唔驚迪士尼夜間巡遊對撼㖭。現場都有播羅蘭、黃夏蕙同盧海鵬合演嘅廣告片《嚇死篇》，真係好得人驚。