日前上fb，朋友瘋傳洗版，人人怨聲載道，一片愁雲慘霧如喪考妣，還以為伊拉克和黎凡特伊斯蘭國已經答應參與佔中，誰不知原來是全城爭先搶iPhone。繼淋冰熱潮過後，又開始玩一次tag三人，自爆每日三件感恩事，但有些轉數快的人立即因利乘便，改為「是日三大憾事」分別為：「我抽唔到iPhone，我又抽唔到iPhone，以及，我都係抽唔到iPhone」；入了標等派彩的人心情忐忑仿同等放榜，一旦中標者雖狂喜程度未及中六合彩，亦等同古代妃嬪苦候老太監派籌，通知哪個今晚得皇上寵幸般的心如鹿撞。全城同步mark時間，齊齊fb發表：「乜唔係夠鐘咩？點解入唔到？」我一位讀飽書食無憂米的少婦友人則有坐亞望冠之勢，在fb訴苦：「要iPhone 6？定6 plus好呢？」大概浸淫於指掌玩意之中玩物喪志，日子有功，如今淪為一個公告天下自認拿不起主意、甘心臣服在二選一痛苦之中的消費者。「團結就是力量」、「我們不孤獨」、「同是天涯淪落人」……等等心理傾訴，不論知心與否都在fb完全體現，只求向虛空的個體發表，毋須回覆。
潮流做主宰
那些等買電話的差不多可以肯定已經擁有電話，但問題不在於此，單單擁有是孤掌難鳴，跟得上潮流才不至落於人後。大家縱然多匆忙，但仍心繫有件事情叫「潮流」的在做主宰，既分莊閒，主客有別，應如男女之情，凡目標出現，追求者定必亦步亦趨，別以為恩客勢強，財可通神，人家就睇通睇透，手握要害，鬆緊有致，拿揑由人，不賣就是不賣，吹乎哉？君不聞古時青樓名妓歌姬，即使車馬填門，只要佳人心情差便一例回絕，恩客縱然媽媽聲，改日又何嘗不是自圓其說好草不怕回頭吃？此例四海皆準、千古不變，總之人有你無，慘過敗家，豈止是out，就可能連自己生存的尊嚴與樂趣都要一鋪清袋了。而更慘是人有我有是必然，所以早着先機者勝，物以罕為貴，趁還未成行成市便已經手持一部招搖過市何等風光！花費一萬幾千無非就為贏得個「出眾」二字，惹來妒忌欣羨目光，要與人不同，但傳染快過伊波拉，未夠三兩月，通街都是同路人，結果又是人人相同，可能大家出盡法寶搶phone，原來暗藏心底最深一角的密碼，就是希望自己能夠與別人相同，大概我們都是城市人，城市人都怕孤單寂寞。
大家原諒我有點心神恍惚……妖！我又抽唔到iPhone喇！
【一言棠】
撰文：歐錦棠
除表演藝術，也酷愛文字、影像及武術，其文章往往一針見血。
本欄逢周五刊登