港大醫學院噚日有喜，唔係嫁女，亦唔係院長梁卓偉請飲，而係再獲巨額捐款。醫學院獲得本港龍頭私院、養和醫院捐出二千萬元，其中一半捐款用作支持醫療教育，另一半捐款係首次支持護理教育，希望幫助護理方面嘅專業培訓。
養和同港大醫學院嘅淵源十分深厚，早於1961年，養和醫院首任院長李樹芬醫生，已經向母校捐咗一塊薄扶林嘅土地畀醫學院做擴建，之後建成李樹芬樓。根據資料，養和醫院歷年向港大醫學院累積捐款，已經超過1.8億元，對專科培訓、科研工作作出好大貢獻。港大醫學院院長梁卓偉話，希望藉此培訓更多優秀嘅醫護人員同學者，造福社會。事實上港大醫學院的確為香港同養和，栽培唔少人才呢！