富豪國際（078）太子女羅寶文舊年底升做副主席後，積極擴展集團酒店業務，噚晚現身旗下兩間新商務式酒店iclub開幕禮時，大呻忙到24小時都唔夠用。照咁講，佢咪仲未有時間拍拖囉！
寶文爸爸、富豪主席羅旭端，同埋公司兩位執董范統同吳季楷都有現身開幕禮，不過為免搶愛女鏡，羅旭端只係低調喺台下招呼來賓，未有公開發言。
今次新開張嘅酒店位於上環同天后，羅寶文話嚟緊喺土瓜灣同上環又再開多兩間iclub。佢話，除咗忙住開新酒店，集團仲有好多項目搞緊，想有多啲時間可以用咁話。
吳季楷補充，商務式酒店主要出租房間，提供嘅餐飲服務較傳統酒店少，毛利反而高啲，所以嚟緊都會落力以iclub呢個品牌發展。