阿仙奴邊個位置最等人用？我求大俠都聽身邊班槍迷講咗幾年，咪係防中同埋中堅囉，但可惜就算球迷講到口都臭，領隊雲格都係唔做嘢，喺轉會窗開緊嗰陣鬼死咁老定，結果𠵱家咪臨急抱佛腳，「垃圾堆」中尋寶要搵尤保同盧根奴呢班失業大軍救亡。
兵工廠上季得3個中堅，分別係梅迪薩卡、哥斯尼同華美倫，今夏華美倫走咗去巴塞隆拿，雲格淨係簽咗個新仔哥林張伯斯返嚟，問題仲嚴重咗。好似右閘迪保治上場聯賽足踝受傷，雖然冇骨裂，但傷到韌帶，佢話今日就知使唔使做手術。如果迪保治長唞，哥林張伯斯頂上踢右閘，咁阿仙奴就連一個後備中堅都冇，萬一梅迪薩卡同哥斯尼受傷停賽，可能真係要搵青年軍打正選。
英國傳媒話，雲格終於發覺中堅人手短缺，情況仲係刻不容緩，希望盡快簽人返嚟幫手。𠵱家轉會市場已經閂咗，阿仙奴只可以簽啲自由身球員。喺呢班失業大軍入面，雲格睇中咗盧根奴同埋尤保，覺得佢哋勝在有英超經驗。盧根奴今年33歲，上季踢西布朗，出場機會唔多，但佢今夏入選烏拉圭嘅世盃大軍，仲有落過場。尤保34歲，以前踢愛華頓出名，近年去咗費倫巴治，上季外借諾域治。雖然盧根奴同尤保都叫有啲來頭，但嚟到9月都冇球會要，相信兩位嘅狀態都唔係好掂。不過，正值用人之際，搵住個坐喺後備席應急都好過冇。
虛驚一場 韋舒亞傷勢無礙
除咗中堅，雲格見阿迪達都開始年紀大，加埋法米尼都係得兩個防中，亦打算執多個免費防中返嚟，目標係以前踢過阿仙奴嘅狄亞拉，佢𠵱家先29歲，仲踢過車路士同皇家馬德里，歐洲頂級大賽經驗豐富，相信可以增加陣容深度。另外，韋舒亞禮拜二在歐聯分組賽右足踝受傷，但經檢查後發現唔太嚴重，而韋舒亞都有信心可以好快復出。
講開阿仙奴啲轉會，唔爭在提吓皇家馬德里門將卡斯拿斯。英國《每日郵報》又話雲格諗住趁卡斯拿斯呢排喺皇馬唔太開心，成日俾人噓，想喺1月斟佢過檔。
識睇，一定係睇足英台【英波Live】：
http://soccer.appledaily.com
http://bit.ly/engballlive