楊千嬅昨日以親善大使的身份，出席在海洋公園舉行的「哈囉喂全日祭」香港女童軍愛心慈善日，兒時未能加入女童軍的千嬅，寄望囝囝能做童軍，她說：「作為藝人子女有代言力量，希望佢大個會做多啲公益。」因兒子Torres年紀尚小，千嬅稱在萬聖節不會為他扮鬼扮馬：「淨係試過佢未識嘢嗰陣着過南瓜衫，老公好少嚇我，我堅嬲㗎！試過去美國主題樂園玩，夜麻麻唔知人定乜嘢，咪一手撥開佢，我係男人嘅力度。」
DaDa約仔點愛火
今年哈囉喂代言人羅蘭、夏蕙BB及盧海鵬亦分別以電影《殭屍》中孖女及看更造型現身，鵬哥搞笑地說：「拍攝短片嗰陣要扮驚，不過冇乜嘢嚇倒我，我都會去鬼屋玩吓，有間有限制級㗎嘛！」夏蕙BB表示與影后羅蘭及影帝鵬哥合作好開心，但從未玩過鬼屋。已連續第五年代言的羅蘭，被問酬勞有否加碼？她笑謂：「通脹呀嘛，不過我冇脹。」
獲邀到場試玩的陳靜（DaDa）透露已邀請上海男來港玩鬼屋，她直言到時會扮驚，讓對方有機會護花。記者笑指如果上海男更驚？DaDa說：「我會保護他，其實我都好man，咁互相保護大家，肢體接觸在所難免。」又透露兩人日日聯絡，希望藉萬聖節擦出火花。
採訪：盧妹
攝影：仇志德
