咁鬼快又一個禮拜，鬼咁攰既龍叔叔又再繼續煲碟趕稿，咁鬼啱《盂蘭神功》BD見街，順理成章寫鬼埋佢先瞓。點解龍叔叔不停鬼鬼聲咁難聽？皆因睇完影帝張家輝首次執導嘅《盂蘭神功》，成套戲不停鬼影幢幢，由街邊燒衣到神功戲棚，街邊𡃁鬼、騎樓底吊頸鬼、戲院老鬼，總有大大小小嘅鬼魂出現，5分鐘一小嚇，10分鐘一大嚇，好似七仔咁，總有一隻係左近。猶幸聲畫表現屬中上水準，幽暗畫面加緊湊音效，好多嚇人位都幾到肉，密集式驚嚇亦未至於令人厭煩，只是龍叔叔畀套戲嚇到攰，身旁女伴亦嗌到攰而已，對於愛自虐俾人嚇嘅觀眾，《盂》絕對可令你繃緊80分鐘。
家輝首執導演筒，當然谷到盡，好幾場戲close up大頭畀反應，都睇到佢谷盡影帝演技。心悠BB靚樣繼續無得輸，至於同家輝嘅床戲就流過劉華，大家無謂期望太多。古仔條橋其實幾OK，雙線劇情玩復仇，結尾有種「原來係咁」嘅覺悟，只係好多細節位唔合理兼交代不足，令人有種虎頭蛇尾之感。
七成嚇位靠音效
可能畫面玩《2046》feel，懷舊色彩加上長期昏昏暗暗，BD畫面表現沒剛推出的《紅VAN》那麼銳利。好死唔死，在光位場景畫面變得較sharp時，明顯見到心悠BB臉上粒粒多到嚇死人，真係名副其實見光死，呢點喺戲院都無咁覺眼，喺屋企睇BD就現晒形。聲效是龍叔叔激讚部份，跟《紅VAN》一樣，音效採用Dolby TrueHD 7.1格式及24bit/96kHz取樣，高音鬼叫或掟嘢低頻聲都好有力，加上緊張的背景音樂編排，成功嚇人有七成算是靚聲功勞，但稍嫌預設音量比較細聲，若要重現戲院感受，須加大一點聽慣的音量。
Bonus收錄上唔算太豐富，例牌預告片同演員訪問，反而相片集幾有心思，每張相顯示完都會掟落火盆度化咗佢，好彩冇人背後嗌龍叔叔收嘢咋。
龍叔叔簡介：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。