希望大家見諒，呢篇會似財經版專欄多過講足球，因為小弟研究咗曼聯近年嘅財政報告，想分享少少發現。
曼聯上季收入4.3億鎊，人工支出2.15億鎊，兩項數字都創新高，而人工佔收入比例為49.6%。換句話，曼聯近一半搵番嚟嘅錢係要嚟出糧。其實近年曼聯一直保持住呢個平衡，人工唔可以過收入嘅一半，09/10球季，呢個比例係46%，10/11球季係46.1%，11/12球季升至50.5%，但會方即將呢個比例壓低，12/13球季回落至49.7%，上季就係49.6%。
曼聯上季加朗尼人工到30萬鎊周薪，朗尼值唔值係一回事，但球會絕對係諗過度過，人工上限都可以增加，所以咪畀高啲人工。曼聯呢方面掌握得非常好，12/13球季，曼聯收入升13.4%，人工支出升12%；上季，曼聯收入升19.3%，人工支出升19%，真係計到啱啱好。
計埋雪佛蘭筆新贊助，曼聯預測今季收入至少下跌至3.95億鎊，人工支出亦應壓低，但曼聯狂簽球星、畀高薪，今季人工佔收入比例肯定破5成。人工佔收入比例太高的話，長期肯定唔健康，所以從財政角度睇，曼聯今季真係玩鋪勁，博入前4，到下季有返歐聯轉播收入，令收入回升，從而將人工佔收入比例降低。萬一再冇前4、收入再跌嘅話，曼聯會點做？可能要減人工、炒人囉。
文：咖喱