上周放假到上海一遊，原定8點鐘機，晨咁早5點9就出門，機程兩小時，原定10點半抵埗。點知飛機降落後冇位泊，12點至落到機，去到酒店成點鐘。熊貓眼上身，可幸能提早check in，第一時間搵周公傾偈。但當日係新iPhone首批預訂，所以校鬧鐘3點起身大抽獎，點知酒店上網龜速，2G鬥4G，當然食白果。
酒店樓下係IFC，格局同商舖跟香港成個餅印。放假酒癮發，落樓下Citysuper逛逛，見紅酒價平均貴香港七成，賓富支BIN 128就賣五舊幾人仔。有支貴得離譜，早前喺香港特價三百，嗰邊竟然賣1,800幾蚊人仔，貴成六倍，難道上海人對Grand Puy Ducasse亦情有獨鍾。
上次遊上海已是14年前，嗰陣陸家嘴仍處發展初期，同而家係兩個世界。今次雖然僅逗留三日，好彩有喺當地工作嘅朋友作嚮導。朋友講了不少當地趣事，例如喺當地搭車遺失物件，報案搵返嘅成功率極高，事關當地四圍都裝咗CCTV，以身試法隨時無所遁形，無謂博也。當然，以受嚴密監控換取治安好，值唔值得就見仁見智。
無可否認，作為中國的金融心臟，上海金融基建等硬件發展得好好。但喺當地金融機構任職嘅友人，話幾年間遇過不少人事或制度上嘅騎呢事，從人力資源角度看，港人仍有明顯優勢。旅途上與的士司閒談，佢話上海十幾年嚟發展得好快，但自從上任市長落台後，過去六年發展就停滯不前。個人認為除咗當地政治因素，恐怕亦是中國經濟奇蹟散Band嘅寫照，難怪阿爺早兩日推出常備借貸便利操作（SLF）撐經濟後，市場預期仲有後着。
倘蘇獨泡湯 英鎊可見1.65
本周滙市繼續係美元嘅世界，聯儲局本周繼續打穩陣波，冇刪除「維持低息一段時間」呢句前瞻指引，令大家冇咁驚明年3月加息。但儲局喺最新季度評估內，上調未來兩年的息口預測，令美元繼續受追捧。
美滙指數本周升至84.76，再創四年新高，上周解釋過形勢使然，市場沽yen無懸念，短期要翻身，誇張講句仲難過抽iPhone。美金噚日升到108.88日圓，每百日圓低見7.1199港元，加上美債息趨升，美元上試110、日圓兌港紙見7算，應該好快到。
執筆時正值蘇格蘭公投，會唔會成為影響歷史嘅另類918事變，今日有分曉。英鎊上個禮拜守住1.6關口後，呢幾日喺1.62至1.63美元之間上落，反映市場認為統派可險勝，但票事難料。後市方面，暫時睇唔到可令美元轉勢嘅因素，但如果蘇格蘭脫英不成，英鎊保守估計可反彈至1.65美元。
奇兵
本欄逢周五刊登