滬港通未開通，相關概念股已炒到癲，但如果你係內地投資者，要買港股的話，係咪都要睇吓啲行情，故一批資訊媒體股有運行，短線可留意新華電視（8356）。新華電視前身為進業控股，2011年以7億銀收購新華電視業務，透過發新股同CB找數，公司控股權易手，引入新華社附屬為大股東。入咗股後股價一直升至去年底嘅1.47元，之後曾一度出現疑似斬倉，但過去超過大半年時間都築咗個靚底，而大股東日前行使咗啲CB，增持公司約4.08億股新股份，持股量由20.65%增至29.42%。大股東喺家陣增持，應該有啲嘢。
其實大股東一直都好照顧公司，當年大股東係以CB控間公司，若換股債未兌換成股份，公司係要畀大股東五厘息。近兩年大股東無條件豁免條數，該批CB本金5.7億元，兩年間慳咗利息開支約5,700萬銀。公司轉型後業績仍未扭虧，但淨係大股東個朵已經夠照，係新華社！而第三大股東係亞太衛星（1045），亞衛近年股價走勢好似火箭咁，但第二大股東係HEC Capital，呢間公司近年戰績彪炳，近期佳作有中國微電子（139），升咗超過10倍，故其下注落新華電視身上，應係博倍升，趁隻股呢幾日蠢蠢欲動，唔怕順勢上車。
古道祥
本欄逢周五刊出