人妻傅珮嘉（Maggie）4年前奉子成婚，嫁畀開餐廳嘅台灣老公周思甫做老闆娘。囝囝𠵱家已經3歲大，對樂壇死心不息嘅Maggie，最近改名傅又宣，仲會喺下個月推出國語細碟。噚日有讀者報料，懷疑Maggie整容變面大翻身，事關初出道嘅Maggie鼻扁扁、鼻頭有肉，但復出嘅佢就變得鼻樑筆直、鼻尖尖。
「朋友話我瘦咗」
噚日馮仁昭就打電話問Maggie係咪整容復出？身在台灣嘅佢大笑否認：「冇呀！」對於個鼻俾人懷疑直咗又尖咗，Maggie就自嘲話：「我個鼻一直都咁扁。」為咗以最佳狀態復出，Maggie仲努力瘦身，佢話：「朋友話我明顯瘦咗好多，不過我至少仲有10磅需要減。」
呢排Maggie不停台灣、香港兩邊飛，又要做新歌後期，又要拍唱片封套，早排仲忙到發燒病咗，要去養和睇醫生，難怪佢大呻：「連陪囝囝嘅時間都冇，我惟有將依依不捨轉化為工作動力。」
撰文：馮仁昭
