冠軍騎師潘頓嘅心情可以話好壞參半，好嘅當然是他繼開鑼日起孖後，剛周三晚沙田夜馬又憑時廐「巴其利」和沈廐「幾叻仔」再添兩W。不開心就係當晚潘頓第五場搏輸「競技英雄」後，喺過磅室範圍內向華籍受薪董事郭前，作出不恰當言論，被罰2.5萬元。點知潘頓禍不單行，馬會公佈周日(21日)第九場9號容廐馬「世界都市」由潘頓改配華將賴維銘策騎。「世界都市」被評120磅，但肥仔潘頓體重達121磅，根據條例負120磅或以上嘅馬，唔可以超磅上陣，所以焗住換人。
潘頓曾經說過，指「世界都市」潛質高，埋門試閘得亞軍走勢又好，而且贏過田草1200米路有根據，絕對係佢嘅頭馬希望，家陣冇得騎，一定喊得一句句。
好在潘頓仍有唔少實力座騎，好似另一匹容天鵬馬房嘅「天時駿駒」就係好例子，上季三捷中，兩場由潘頓建功，人馬合拍。潘頓指「天時駿駒」今場初跑二班負磅輕，威力有增無減。日前試閘名次較後，純因為佢冇畀隻馬太大壓力，走勢其實很輕鬆，狀態已呈勇中，加上估計「天時駿駒」評分未盡，所以寄望甚高。