星辰通信（1155）上半年有靚仔成績單，但只係頭啖湯，嚟緊日子，食住4G投資潮，係肥過肥仔水，4G股當中，星辰PE、PB橫掃全場，平霸！
星辰公佈冇耐今年上半年嘅成績單中，由上年見紅嘅1,333萬元人仔，轉為期內純利2,860萬元，已經係好靚仔。又工信部繼喺上年尾發放嘅TD-LTE牌，再喺今年中，批准TD-LTE/FDD-LTE混合組網。
對講機業務堪憧憬
據星辰觀察，通信設備相關行家，由上年絕大部份時間觀望，開始轉為活躍。呢個由靜轉活階段，已經令星辰無線電信覆蓋系統設備工程有運行。而呢瓣業務，屬於網絡建設中後期產業鏈，嚟緊日子，先至係星辰業務高峯期。
星辰新開的另一瓣數字對講機，阿爺已經order，由虛擬轉到數字對講機制式，要係2016初搞掂。又報載，喺褔建省信息化局支持底下，省內企業共同發起，為數字對講機國家標準提案。而佢哋提供標準，多次通過專家評審，有望成為國家標準。
睇到係，星辰唔止食住國策，又集團基地，就正正喺福建，更加近水樓台，去分享估計高達500億元人仔市場。再講，星辰啱啱呢個半年度，對講機收入得2,900萬元人仔，只係佔總收入4%，基數咁細，高增長一反映，不得了。
星辰上年唔計減值撥備7,600萬元人仔，實際純利係去到8,170萬元人仔，又上邊兩瓣業務，有咁好優勢，斷估星辰今年唔使再撥備，純利係咁意去到9,000萬元，預測PE得6.4倍。
又星辰喺呢個八年海底價（0.94元）PB得0.37倍，PE、PB平霸4G股！買星辰，KEEP住睇佢翻一番到1.9元，PB仲係得0.7倍，陰功！
錢雋
細價股專家
本欄逢周二、三、五刊出