練馬師Michael鄭俊偉喺晨課忽然以四眼look示人，細問之下，原來他有500度深近視，但太長時間戴有框眼鏡會好攰，所以平日都係戴Cons(隱形眼鏡)，不過呢日趕時間出嚟督操，所以匆匆戴番個有框眼鏡。除咗大近視眼矇矇，以及早排兩邊面頰造激光去斑手術失敗二級燒傷外，Michael隻腳亦有問題，見佢行路時唔太自然拐吓拐吓，幾辛苦吓，Michael解釋自己膝頭勞損，醫生叫佢多啲休息，先可以快啲好番。
雖然身體有唔妥，但Michael依然頂硬上冇愉懶，呢日「駕悅」、「龜兔競跑」等駒出跑道操練時都跟到實，操完亦送佢哋返馬房，冒住腳痛之苦積極督操，可見心中有馬。
其中信和地產老闆黃志祥愛駒「連利多」，周日轉鄭廐初出，出戰一班1400米廣東讓賽盃，備受關注，鄭俊偉話好感激黃志祥的賞識，佢指出「連利多」的質素有幾高根本毋須多講，雖然健康有過好多毛病，但經治理後家陣情況穩定，近期亦可辣操，對隻馬的機會感到樂觀。至於配何澤堯嘅「駕悅」，上季一出就跑第二，Michael話佢喺四班分量十足，最近試大閘得季軍走勢亦好好，狀態已相當弗，有一定取勝希望喎！