回憶係美好嘅，法比加斯以往喺兵工廠，又可以入波，又可以助攻，曾經係英超最好嘅中場之一，可惜佢個心總係掛住巴塞隆拿。因為話晒昔日都喺西班牙受訓，點都有感情，而咁啱當時巴塞隆拿又要搵人，咁就發展成兩情相悅，馬上入「營」。可惜，呢隊巴塞已經唔係佢熟悉嘅巴塞，法比仔冇預期中咁受到重用，最終都係決定離開！高調咁嚟，黯然咁走，總結咗法比加斯喺巴塞嘅生涯！
或者法比仔真係流住紅藍色嘅血！可惜嘅係，唔係巴塞嘅紅藍色，而係兵工廠嘅紅，配上車路士嘅藍。重返英超後，仲要喺車路士踢得咁好，簡直係喺兵工廠球迷身上灑鹽。雖然現代足球係好現實，但係見到沙比阿朗素同丹尼爾艾格唔想同利物浦為敵，而選擇唔轉投其他英超球會嗰陣，呢種感受……我諗大家懂的！
其實再見可以亦是朋友，與其心存恨意，倒不如祝福對方，希望大家都有好日子！所以今個星期，我會首先祝福法比加斯，希望佢保持近來勇態，帶領車路士擊敗曼城；同時更希望阿仙奴作客擊敗維拉，而最好嘅係黑帝韋碧克可以射入佢喺阿仙奴嘅第一個入球啦！
LULU
不懂踢波愛睇波