馬季開鑼，馬場人氣大旺，竟有74281人入場，比去年上升12%，應該係十幾年來一個新紀錄，投注額高達11.39億，比去年開鑼日增長10.3%，個勢頭咁好，如能維持落去，今季全季總投注額又會破紀錄，令馬會可以捐出更多善款。點解2011馬季開始，入場人次與投注額會轉晒方向，由停滯不前變成高增長呢？一時之間諗唔通，按表面所見，香港馬迷雖然人數不少，但平均年齡偏高，年青馬迷並不常見，即係話新客比較少。又例如會員方面，路邊社消息話新會員入會時嘅平均年齡已踏入成熟之年，兼且馬會會員人數（香港）自2011年開始，人數有遞減趨勢，2014年（截至六月三十日）本港會員人數有25853人，比2011年減少咗1150人，主要係「缺席會員」（Absent Member通常係僑居外國，保留會席嘅會員）大幅度降低所致，好可能係缺席太久，索性退會啩。唔係話好多人恨入馬會做會員嘅咩？對唔住，2014年只有129人係新「全費會員」，185人加入為新「賽馬及其他會員」，遠遠低於每年入會嘅最高限額。咁即係咩嘢意思？路邊社消息話，好多遴選會員費事麻煩，極度嚴格地篩選，非至愛親朋、相識甚久嘅親友，一於唔願意提名入會呀。
回歸後開鑼日必有特首盃，開跑前，左丁山話好易買啫，三號「神舟十號」係明星馬，試閘跑第一，練馬師志切捧盃，馬主黃光苗，有位著名親戚，就係黃楚標，數碼廣播電台DBC大老闆，DBC主席係李國章，行政會議成員，特首擁躉也；五號馬「金滿載」馬主王國強，建制派之響噹噹人物，廣東社團總會與東莞同鄉會之大人物，當然又係特首擁躉，梗係想捧特首盃啦，沙圈內，黃楚標與王國強有動作，兩位老友一定係想一Q返嚟啦，所以左丁山叫晒朋友買3、5單Q，重注無妨。結果呢，一殼眼淚，五號「金滿載」後上輕易取勝，三號「神舟十號」前領入直路後潰不成軍，累得左丁山全日重注泡湯。賽馬就是這樣的，根據賽後報告，「神舟十號」接受檢驗後，發現「心律不正常」喎，都唔知係邊個運滯咯，左丁山肯定係其中一個。賽後拉頭馬影相，黃楚標有份吖，黃王兩兄弟邊個贏都係一樣，王國強以前未贏過大賽，今次從林鄭月娥手上接過特首盃，笑到見牙唔見眼，想來以後會更有心機買靚馬，建制派大亨必定在馬場越來越風騷！