「多謝Paco」，係本地樂壇成日都聽得到嘅致謝辭，歐洲球壇都有金牌經理人，佢就係佐治文迪斯（左）；佢旗下球星足夠組成一支具挑戰歐聯冠軍嘅隊伍，好似C朗、占士洛迪古斯、迪基亞、比比等，仲有領隊摩連奴領軍；上星期文迪斯應該好開心，因為佢旗下囝囝迪馬利亞幫曼聯大勝開齋，呢單英超最貴轉會，起碼𠵱家紅魔鬼上下都覺得抵畀。
數一數文迪斯旗下球員今夏主要轉會，迪馬利亞、占士洛迪古斯、文加拉、法卡奧等，保守估計經理人抽佣10%計，文迪斯已經進賬2,000萬鎊，仲未計暑假球星拍廣告做代言人搵真銀。足球經理人嘅天敵就係忠心球員，經理人搵真銀期間，每每就係轉會市場一買一賣，球員越忠心唔肯離隊，甚至忠心到就嚟約滿先同球會傾新約，亦都減少咗經理人搵真銀嘅機會。所以到時到候，C朗又會傳吓轉會新聞，就算走唔成，都博皇馬關注傾新約加多幾錢肉緊，難怪皇馬聯賽又輸波後，就傳C朗心淡想返英超，曼聯同車仔都係心水，仲話周薪有50萬鎊㖭。
或者有人批評，文迪斯呢類經理人就好似水蛭，以依附生物吸取血液為生，而且唔係佢哋搞風搞雨，令轉會費、球員人工不斷攀升，變相令門票、直播費大增。不過冇文迪斯存在，對我哋呢啲以國際足球新聞為生嘅人士，又點可以世界盃完結到歐洲聯賽開「咧」前，幫我哋製造頭條新聞。
文：牽牛