寸嘴Barbie夏尉喻Rap住殺入周星馳新片《美人魚》，想當年星爺身邊的一班綠葉，一句對白一個表情已笑到噴飯，「星之綠葉」點止星喱咁簡單！
「最佳男主角—阿發外父！」入行30多年的潘恒生先後奪過金像獎和金馬獎最佳攝影，但攞獎攞得最出位一次，卻是《大內密探零零發》中撼低女婿周星馳奪最佳男主角。一句「我見到佢入咗雞竇」令潘恒生成為出位星之綠葉。儘管星爺近日是非不絕，潘恒生卻力撐星爺凡事力求完美：「我覺得佢絕對係針對件事，而唔係針對人。」
撰文：譚倩宜
曾10次提名並兩度奪香港電影金像獎及金馬獎最佳攝影的潘恒生，當年為電影出任攝影師時，因調節燈光及教演員走位而經常於鏡頭前進出，被導演點名出鏡客串踏上演員之路。他日前接受訪問時說：「我唔係全職演員，只係間中客串吓，最初啲人因為我食齋，所以搵親我都係叫我演和尚，係演『阿發外父』之後多人識我。」
攞獎心情問嘉玲
在《大內密探零零發》中，潘恒生扮演零零發周星馳的外父，片中一句：「我見到佢入咗雞竇呀！」輕易KO星爺，在電影內奪得最佳男主角，更憑得戚鬼馬演技成功出位。提及臨時加插頒獎一幕，潘恒生笑指當時完全是對其演技的考驗：「佢哋要求我做番當年得獎心情，仲話越誇越好，但我當年攞獎嘅反應啱啱相反，只係好平實咁多謝人，所以都諗咗好耐要點演。𠵱家呢個版本，係同劉嘉玲佢哋傾完得出嚟。」
回想跟星爺合作的點滴，他稱對方是個凡事力求完美的人：「佢所有事都希望做到完美，外人會覺得佢太認真接受唔到，但我覺得佢絕對係針對件事，唔係針對人，呢個係我欣賞佢嘅地方。」潘恒生直言星爺是個「轉數太快」的人，未來得及說想說的事，腦袋已轉到另一題目。
雖然近日星爺被猛烈抨擊，但潘恒生卻另有看法：「我見過佢因為個新人達唔到佢要求而有情緒，但當佢見到對方有努力，佢就會以行動去表達原諒，但從來唔會講出口，呢啲係要觀察先會見到，好似是非咁，佢從來唔會解釋，亦唔介意人哋講乜，所以公道自在人心。」
星爺電影講本質
他坦言星爺電影對社會影響深遠：「好嘅電影會流傳，好似《少林足球》同《功夫》咁，佢以電影話畀你知，一個人本質係好，無論社會點改變你，你最終都會係一個好人。不過星爺從來都唔邀功，覺得拍好電影係應份做嘅事。」近年潘恒生已退下火線，於母校浸會大學電影學院擔任講師，早前網絡潮片《一生只想尋找一個肯挨麥記的女人》的導演，亦是他的學生。他感嘆現今是個資訊爆炸的年代：「只要有一部手提電話，人人都係攝影師。」跟自己當年的學習環境相距千里。
兩女之父 升級外公
潘恒生於76年浸會大學傳理系畢業後加盟香港電台當攝影師，80年代投身電影圈，先後憑電影《生死線》和《阮玲玉》兩奪香港電影金像獎最佳攝影，《阮玲玉》更為他帶來金馬獎最佳攝影的榮譽，甚至憑于仁泰執導的電影《Freddy vs Jason》進軍荷李活。
而潘恒生與星爺始於93年合作電影《濟公》，其後還有《西遊記完結篇仙履奇緣》、《大內密探零零發》和《功夫》等。婚後有兩女的潘恒生，兩年前真的做了外父，他笑說：「啱啱做埋外公，大女生咗個仔，但女婿唔係叫阿發。」
