𡃁模經常被嘲胸大冇腦同cheap，成日俾人爆佢哋好多都經營副業，同埋手腳唔乾淨，關仁近排都聽到一單笑料，話說𡃁模「一把劍」成日以登台為名，返內地賺人仔，不過當然唔係捽碟唱歌咁簡單，佢都成日出席富豪飯局，黐飲黐食仲賺大利是。一把劍仲貪上癮，關仁聽聞佢成日去完飯局都一定又食又拎，如果佢打包啲未食晒食物都叫有衣食，但關仁就聽聞佢成日吩咐侍應另叫炒飯炒麪，唔知佢係咪真係咁大食，食飽都要拎上房，佢仲貪到連酒店房雪櫃嘅汽水、啤酒，甚至零食統統掃走，好似餓鬼咁，所以𠵱家一把劍入咗神憎鬼厭名單，係人都怕咗佢。關仁覺得佢可以將啲罐裝飲品都放入拖篋拎走，唔怕重呢吓先叫人佩服。
撰文：關仁