政圈呢期興「去飲」，其實唔少政治恩怨情仇都由埋枱飲茶引發。話說早前嘅7.1授勳名單，18個區議會中僅元朗同沙田區議員榜上冇名。據聞元朗區除咗因為唔放地皮畀狼英起樓，仲因為一杯茶得罪狼英，結果被狼英「殺無赦」，兼要「倒瀉茶」嘅區議員道歉，八方講咗好多次，方丈，真係好小器。
7.1授勳 元朗區食白果
之前有傳元朗區授勳中空寶，因為議員唔聽話，喺撥地建屋問題上寸土不讓。八方聽聞除咗呢個原因，有樣嘢更辣着狼英。話說民建聯區議員李月民，授勳前同運輸署職員坐埋一枱傾巴士路線重組；當發現對方冇接納佢意見，唔知有心定無意，將成杯茶「倒瀉」落署方職員身上，有關人員將呢單倒瀉茶風波匯報上級。
據聞事件驚動狼英，曾被掟玻璃杯嘅狼英，拍枱咁滯鬧「倒瀉茶」係暴力行為，絕不能姑息，最終「大開殺戒」，喺授勳名單上元朗區議會一席不留。八方聽聞，唔少官員為咗息事寧人，建議李月民同運輸署擺和頭酒，點知狼英執正嚟做，甚至要梁志祥寫信代條𡃁道歉！
呢單茶杯風波，唔易收科，八方問過梁志祥，佢話本來唔想講，一講就把幾火，澄清其實係李月民兩度去信運輸署署長耍冧至真，點知署方唔係話佢唔夠誠意，就恐嚇話唔排除採取法律行動，激到梁志祥紮紮跳，斥運輸署欺人太甚，遏制議員反映選民意見，兩方最終紮馬收場。但係咪因此令元朗區授勳零收穫？梁志祥話唔作評論，總之對呢宗「倒瀉茶」風波深表遺憾！
李八方
mailto:[email protected]