為慶祝中共建政65周年，左派不惜工本泵300萬蚊（其實有92萬係特區政府出），10月2日喺紅館搞國慶文藝晚會，當晚有鄧梓峰擔任司儀，小肥、張崇基、張崇德、肥媽、欣宜做表演嘉賓，不過負責製作嘅春天舞台劇製作行政總裁高志森，唔係將推介重點放喺呢班港星，反而落力硬銷香港冇乜人有興趣嘅駐軍文工團朗誦《我驕傲，我是中國人》。
只係睇過駐軍綵排一次嘅高志森猛讚駐軍表演質素係「博士級」，又話點樣可以令一個90人嘅朗誦團，將朗誦時嘅抑揚頓挫做到一齊放、一齊收，嗰種震撼人心難度極高。不過八方相信呢類「紅味」十足表演，大部份香港人都唔識欣賞，不過若然仲想睇其他港星表演，民政署26號開始喺18區派4,000張免費晚會飛，大家有興趣即管去攞。