可能物以罕為貴，好多馬迷都對啲灰馬有情意結，香港賽馬史上最受歡迎嘅灰馬，乃贏過11場頭馬，包括連勝遮打盃及主席獎嘅「及時而出」。而現役最高分灰馬「加州萬里」，就係兩屆香港盃冠軍，亦都好多人like，不過呢匹馬即將九歲，話冇退化就呃你嘅，咁未來全港最強灰馬，將會喺邊隻呢？
黃志祥家族嘅「連利多」，公認實力深不可測，前季到港斬瓜切菜咁連贏三場，上季亦曾經同遮打盃盟主「將男」串Q，可惜因為腳傷及氣管有血，至今缺陣十個月，多人都以為佢嘅競賽生涯已經玩完，但實情「連利多」轉投鄭俊偉馬房後，健康大有起色，本月6日試嘉年華大閘，臨尾輕騎反應凌厲跑第三，走勢相當好，到上周末三駒齊拍跳，末段造22秒9衝刺，勁到不得了，傷患馬可以辣操大力催谷狀態，絕對係好現象。睇番「連利多」前季初跑級際賽皇太后盃，只係輸半身位得季軍，呢匹馬今季一旦健康無礙，絕對有力問鼎各項中長途大賽，成為全港最強灰馬。