某國駐港榮譽領事請客，席設賽馬車會，菜式中有沙巴龍躉兩吃，葱油炸球伴以粟米汁及甜酸汁，食客有得揀，魚腩則用以蒸籠蒸飯，此則為少見之作，飯味鮮美可口之至。財務F問侍應：「賽馬車會有何特別甜品？」侍應云：「新鮮菠蘿包！」眾人轟然大笑，吃過美味龍躉腩飯，何堪再吃菠蘿包？左丁山笑云：「係唔係去美心買番嚟㗎？」侍應連忙耍手：「我地啲菠蘿包真係有菠蘿㗎！」
於是柯打一客，有四小個，每人大約吃八分一至四分一個就夠喉咯，財務F大讚：「果然有切碎菠蘿在內，鮮甜兼貨真價實！」財務F吃盡香港各省各地各國名菜，俾佢讚一讚，一定係正嘢。食到飽一飽，談起天下大事，財務F話：「習總睇嚟真係大權獨攬晒，我睇大公報見到，習主席佔一版大半，李總理只佔一小角，唔怪得外國有人講，中央政治局七個常委就係習主席加六個助理。」
梗係啦，習主席一言九鼎噃，佢上京前係上海第一把手，上海教育局今學年刪除咗小學一班嘅課本內嘅八篇古詩，話唔想難為學生喎，點知習總到北京師範大學視察，講幾句課本教材不應把古典詩詞與散文刪除，上海各中小學立即在中秋節舉辦傳統文化活動，北京小學一年級課本自明年九月起，古典詩詞會由六篇增加到二十二篇，整個小學不少於100篇；哎吔吔，香港吳克儉局長，聽到未呀，快啲在本港中小學增加古文章節啦！
習總反貪腐，覆蓋面廣，除要央企高管削減人工至頂薪不超過每年六十萬元人民幣外，最近「金融時報」（九月七日）報導，中央不准高幹高官拿獎學金讀MBA或EMBA，讀開嘅，要立即退學！中國著名商學院如長江、CEIBS、北大、清華、復旦、交通大學嘅EMBA學費由538,000人民幣至688,000人民幣，實非高幹高官所能負擔，但每每有獎學金之設，呢類人物經常有獎學金可拿，變成免費讀書。獎學金從何而來？咪係大公司及熱心教育嘅富商捐出嚟嘅囉。差不多約30年前已經有聰明人諗到呢個方法嘅嘞，當時啲獎學金主要係幫助官二代入史丹福、耶魯、哈佛呢類名校嘅，捐獎學金幾咁清高呢，送金送鑽石錶就俗不可耐咯！發展至如今，聰明人就捐獎學金俾名校，幫助高官讀MBA，迂迴送禮拉關係，高招也。