地溝油風波後，唔少食肆都中招，不少高官同AO慶幸添馬政總嘅餐廳冇上榜，仍然可以安心享用安樂茶飯。但查實佢哋「食住先」嘅日子，時日無多咯！話說政總嘅canteen，做到23日就關門大吉，唔通圍牆之下嘅生活，真係咁坎坷？八方明查暗訪，發現原來政總餐廳嘅合約到期，新約畀「健民飲食管理公司」bid到，9月30日生效。嘩！佔中「開席」在即，政總餐廳竟然由「健民」揸fit，唔通呢度就係大家「去飲」嘅好場地？
財爺吳得掂愛平民餐
添馬政總canteen開張以嚟，據講評價麻麻，唔少人仲覺得由「嘉嘉得」經營嘅立法會canteen抵食兼好食啲，晏晝甚至會過去同立法會職員「搶食」，一度令立法會出「限飯令」趕絕政總「蝗蟲」。但與此同時都有唔少高官堅持「自己餐廳自己救」，留守政總canteen食平民餐，包括財爺鬍鬚曾、教育局局長吳得掂以及政制及內地事務局副局長劉江華等，不時自己排隊捧餐甚至請客。
但政總canteen𠵱家經營者原來做埋呢幾日就拜拜，事關有新經營者進駐。話說「健民飲食管理公司」bid到政總canteen張約，為期三年，本月30日起生效，每個月租金為港幣108,888。10月1日「去飲」喇喎，「健民」竟然喺政總開餐廳，好鬼敏感喎！唔知啲高官AO，會唔會因為避免政治不正確而唔幫襯，只知近日政總canteen啲職員，紛紛拉住財爺等官員合照留念。行政署發言人回覆，政總餐廳新租戶由鄧文健以健民飲食管理公司經營；雖然合約9月30日生效，但由於要進行一啲裝修，查實下月20日左右先再重開。
李八方
mailto:[email protected]