雷神即係雷神，即使頭三場連續搏輸只得位置，都影響唔到佢喺第四場反敗為勝。呢場四班草地1200米係三T頭關，韋達騎上季最貴拍賣馬750萬之「金珀龍華」，全程貼欄放得一絕，點知雷神仲絕，夥拍「由心出發」留前鬥後，末段從大外欄如飛殺上，及時趕到擊敗「金珀龍華」勝出，季軍則是大泠門「有意思」，此場雷神向韋達報番第三場「勁開心」不敵「紅褲仔」一箭之仇，兼且開季兩戰雷神都同苗禮德合作贏馬；而「由心出發」馬主陳志與大肚的靚靚太太一齊拉頭馬，夠晒開心。
對韋達嚟講，更加冇癮嘅係「由心出發」上季仲由他騎緊，今季轉倉初出卻流入死對頭雷神之手，仲要劏番自己的座騎「金珀龍華」，一來一回都幾傷吓！順帶一提係截至此場雷神季內暫時四次為苗廐效力，總成績係兩W兩P百分百上名，呢個組合絕對靠得住。