無綫甘草演員關菁上星期因為心臟病發離世，噚日下晝1點幾，同關菁識咗好多年嘅李成昌喺微博貼文，寫咗「關菁大哥」幾個字同埋加咗幾支蠟燭圖案，好快就有過百人留言哀悼，送別呢位資深演員，當中包括麥長青，同埋已經離開無綫嘅張松枝。
終年63歲
馮仁昭噚日打咗好多次電話畀李成昌，想了解多啲關菁離世原因同埋後事安排，但佢一直都冇聽電話，最後無綫喺3點幾證實呢個消息，仲透露關菁係喺上個星期因心臟病離世，終年63歲。
關菁1986年加入無綫，參演過無數咁多劇集，係百分百綠葉王，而比較多戲份嘅劇集有《情越海岸線》、《萬凰之王》同《天梯》，離世前仲係無綫嘅合約藝人，不過無綫官方消息話佢生前冇劇集參與緊拍攝，所以唔會對任何劇集有影響。同時，又話已經聯絡咗關菁嘅家人，睇下有乜嘢需要幫手。
撰文：馮仁昭