分唇篇：介面冇驚喜 Siri好抵死
貴為第一部行iOS 8.0兼變身大屏幕的iPhone 6 Plus，大家最期待的無非是拍攝功能、介面以及操控感，究竟這幾方面表現如何？即睇！
港式Siri 識抽涼氣
過往如果玩開Siri，都知道就算要求講故事，它亦做得到！今次的對話更滲入了港式文化，例如現場Peter對住Siri爆了一句：「×街」，豈料對方竟回覆：「你咁爛口，我真係不禁倒抽一口涼氣！」連特首夫人的政治笑話都拿出來玩，可見Siri「智慧」越來越高了！
出奇度：★★★★★
單手操控 畫面縮半
大芒機最麻煩是左右手交叉並用，然而Plus就追加了單手操控模式，玩法是輕觸Home鍵兩下，屏幕就立即縮水五成，你可以一隻拇指操控整個屏幕，無需雙手配合；但這亦衍生了一個問題，就是尺寸少一半之餘，撥打電話時亦只見1-6的數字，要變回「大屏幕」才能繼續輸入7-0，相當爆笑。
出奇度：★★★★
橫向顯示 介面似iPad
大芒版另一賣點，就是手機介面支援由直向變橫向顯示。例如主介面的電話、郵件、Safari及音樂四個icon，橫放手機時會由底部移去側邊；另外，設定頁面亦會由單頁變為左右兩邊分割設計，能獨立上下移動，看起來勁似iPad，肯定會有更多時間打橫來用。
出奇度：★★
影慢動作 過程流暢
首次加入慢動作拍片功能，由以往每秒60格1080p畫質，大幅提升至每秒240格720p畫質。開啟相機之後，左右捽芒就搵到，拍攝過程與拍片操作沒分別，攝錄、儲存到重播，表現大致流暢，亦無窒格迹象；至於Focus Pixels則提升對焦速度，尤其影微距時特別快而準。
出奇度：★★
畫面篇：旗艦比拼 色水、攝力完勝
不論5.5吋Plus是蘋果新突破，抑或是所謂「Android化」，但肯定的是與兩款旗艦級大屏幕高階機比較，它即以完勝姿態跑出！
如果鬥薄邊，Plus肯定不及G Pro 2和Note 3的窄邊框設計出色，但論畫質，現場與G Pro 2比較下，Plus的字體就實淨好多，而且色水亦濃得來較自然。
至於Plus的拍攝功能，更是全機亮點！與配置Ultra Pixels的HTC One(M8)同場較量，影微距毫不輸蝕，Plus顏色較深，M8偏向自然，兩者最大分別是M8景深效果明顯；但鬥夜景，Plus表現就近乎無敵：極少雜訊、對焦清楚，且光暗位反差極小，望落去舒服、自然。