因為最低工資獲封「廿蚊張」外號嘅自由黨飲食界議員張宇人，最近有個新朵「兩蚊張」；由廿蚊減至兩蚊？唔通佢支持最低工資設喺時薪兩蚊？咪誤會住，查實呢位拔萃仔，月底30號生日就滿65歲，可以攞住長者卡，喺唔少交通工具兩蚊任搭！
「兩蚊張」對新朵非常受落，話隨住年紀越大越鍾意弄孫為樂！但快樂日子無多咯，因為喺新立法會會期，佢除咗要接替吳亮星擔任財委會主席，亦輪到佢做食物安全及環境衞生事務委員會主席。「兩蚊張」仲先小人、後君子，話做主席時一定會從嚴，嚟緊想個個禮拜都開財會、但最遲7點半一定俾議員走。至於10月3日象徵式選財委會主席嗰日，佢就因事缺席，或者要寫定封信話願意接受提名做主席，相信唔會因為冇亮相而有波折啩？