學生講咗N次，今次嘅罷課行動係出於獨立思考，唔係受人唆擺，但建制派堅持老屈學生係受泛民指使，經常發表驚人言論嘅保衛香港運動發起人「收工男」傅振中，噚日更以俗稱「衰十一」嘅罪行，即係與未成年少女發生性行為比喻學生罷課，無厘頭話16歲以下兒童係唔應該有性行為；即使兩情相悅，但香港法例都係保障兒童唔好行差踏錯，「如果話佢哋有獨立思考，咁係咪佢哋吸毒又得、做非法行為又得？」
八方唔知明光社對呢番言論有乜意見，只知傅振中同其他團體周日舉行集會反罷課，聲稱邀請梁愛詩、劉迺強、梁美芬出席，遲吓仲會成立網絡資料庫，蒐集泛民勾結外國勢力資料喎。