狼太唐青儀早前當住全港市民面前耍「螳螂拳」，凶神惡殺狂轟中大政治與行政學系高級講師蔡子強「冷血、涼薄、刻毒……」鬧人功力技驚四座，但由鬧人變成演講，佢就有啲交行貨。噚日佢喺香港工商界婦女慶祝中共建政65周年午餐會上主講「香港婦女發展」，全程耷低頭照稿讀，連招牌air quotes手勢都冇出動。
吳若蘭避談彭定康
噚日嘅午餐會，例牌有唔少阿太出席，中聯辦副主任殷曉靜都係主禮嘉賓之一，但狼太甫開口話唔用普通話喎，自己要用廣東話發言，皆因佢嘅煲冬瓜冇人聽得明。狼太演講查實得十幾分鐘，唔知係咪因為佢奶奶有紮腳，所以感受特別深，一開波就提及康有為反纏足嘅運動係中國婦女解放之始，之後引用一大堆數字，例如大學、公務員女性比率升，引證香港婦女發展，仲引用毛澤東同周恩來名言「婦女能頂半邊天」。
英國駐港總領事吳若蘭都係座上客，表面專心嘅佢，唔知聽得明幾多？八方問佢點睇前港督彭定康話英國對香港有道德責任，佢只回應"thank you very much"即閃人。