動物世界其實唔只得貓同狗，鳥類保育同樣值得關注。每年10月4日係世界動物日，今年有本地藝術團體發起「世界動物日明信片2014」義賣活動，推出10款用雀仔做創作主題嘅明信片，宣揚鳥類保育。
捐香港觀鳥會
2011年成立嘅表兄妹創作團體&dear，關心動物權益，經常喺網上幫動物新聞畫插圖。表妹Aimee話，本來佢兩個只係想喺搵工前，用擅長嘅平面設計，吸引更多人了解動物世界發生嘅事，點知越畫越多人賞識，索性全職去做。
今年係佢哋第二次搞明信片義賣活動，以雀仔做主題，搵咗10個本地藝術家crossover，有橡皮圖章印出嚟嘅招牌，有時光交錯嘅創作，又有港產味濃嘅鴛鴦之戀。表哥chee yee話，香港係全球三個有麻鷹出沒嘅城市之一，體會到人類同鳥類嘅對立，希望出一分力幫手保育。
10款明信片全部用環保紙印製，每張20元，全套就賣180元，收入扣除成本後捐畀香港觀鳥會推動保育。詳情可到&dear嘅Fan Page睇吓： http://www.facebook.com/anddear
