告達理、沈集成果然不失季初急先鋒本色，率先喺開鑼日有馬贏，睇番上季數據，告、沈開鑼日一樣有馬贏，而且響其後幾次賽事繼續有佳作，所以呢兩個馬房今次一定要優先考慮。
大告今次出馬唔多，只係兩匹，第七場「香江福星」子彈快馬跑直路賽，好大機會成為大告今季第二W。
呢匹S布自購馬上季到港，去到五月尾先首次上陣，但已經幾乎爆19倍冷門開糊，再出成四倍熱門補中，可見早熟馬狀態話嚟就嚟。今季因為谷草賽事延遲舉行，焗住跑田草，但其實過往唔止一次試田草大閘都可以前列返來。沙田夜馬田草賽事更會利放，有力一放到底。
沈集成出馬就比較多，共有五匹，第二場「彩球」上季開始有表現，其中一冠一亞於同程田泥1200米取得，一場係正常泥地，另一場係濕泥，所以不論今次賽前有冇落雨，都可以應付到，我估呢匹馬會係沈廐今次主力。加上莫雷拉周日到場獨操此駒，咁神心一定有計。