黃宗澤（Bosco）早排傳同內地女星孫驍驍因拍劇撻着，前晚黃宗澤帶住緋聞女友，再拖埋媽咪喺九龍灣出席電影《男人唔可以窮》首映，驍驍蹺實黃媽媽現身，好似一家人咁親密。不過Bosco就誓神劈願咁話：「唔係緋聞女友，佢係我阿媽個契女，即係我契妹，有啲女仔你係知道唔可以發展男女朋友關係。」Bosco再解釋上契原因係驍驍同阿媽都係拜佛好投緣。佢仲好坦白咁話，好心急想搵個女朋友拍拖。
石天欣：留TVB冇價值
首映同場仲有鄧麗欣（Stephy）、石天欣、陳嘉桓、洪天明、廖啟智、林敏聰等，石天欣一離開無綫就簽咗新公司，即刻多咗工作，佢話：「𠵱家做到幾多就賺幾多，公司待遇同態度好好，喺TVB會令自己覺得好冇價值，唔受尊重，唔係幾接受到佢哋嘅態度，搞到好多同事好灰心，嗰時高鈞賢知道我走都即刻打畀我訴苦。」石天欣之後會唔會拒做「姦」角？佢話：「我唔會揀，不過最好唔好啦！」另外，Stephy露腰扮型女，佢話𠵱家正跑步喼弗。
撰文：馮仁昭
【動Live】iPhone 6搶先玩，朝9晚5全港巡迴試機
http://bit.ly/liveiphone6