大孖沙航天科技集團嘅旗下七間上市公司，航天控股（031）嘅PB至便宜；又同系隻隻股價好似火箭咁，但航天控股食正科技大熱，仲要跑輸同系幾條街，冇乜理由。
航天控股最新0.6倍PB，喺香江同系有航天萬源（1185），1.6倍PB，亞太衛星（1045）兼挨近兩倍。祖國同系統中，PB最高有東方紅衛星（滬：600118），去到7倍，航天控股大折讓咗90%！
落後同系一大截
航天控股今年上半年成績單，表面大倒退逾70%，但係唔計上年同期非經營性收益3.5億元，今年半年度的經營溢利，實際上係有不錯嘅增長。
又航天控股畀市場感覺，以深圳航天科技廣場，同海南發射場等等物業開發為主。但集團另一瓣主打，就包括液晶體顯示器、線路板同智能充電器，呢類食正智能大熱嘅科技工業項目。今年上半年，呢幾瓣項目溢利兼增長13%到1.3億元。
今年嚟，凡係涉及到智能電話、4G等等受惠股，閒閒哋1倍PB樓上，兼炒到甩轆。一周三件有主打過嘅通達（698），一年升咗1.3倍；飛毛腿（1399）升咗兩倍。航天控股PB平咗一大截之餘，一年嚟，股價（0.93元）係打橫行未升過。上邊同系航天萬源，一年就累升咗近1倍，亞太衛星亦升咗47%。比起同系，航天控股又係超級大落後。
又場內中航國際（161），份屬另一個祖國大體系中國航空工業集團。同航天控股好似，中航國際喺系內最落後，兼有科技瓣數。
結果，一旦俾資金掘到，喺呢短短兩個月，一支箭咁升咗70%。博航天控股係中航國際小翻版，翻半番到1.4元，PB仲未到1倍，兼未有耐追到科技工業行家，同系內股份。
錢雋
細價股專家
本欄逢周二、三、五刊出