颱風威力驚人，強國人都唔簡單，如果佢哋喺香港離島登陸，唔知會唔會令小島變天？《人民日報》海外版噚日發表題為〈香港自由行，還得往前行〉嘅署名文章，嚇到唔少香港人標冷汗，事關文中竟然建議強國同胞來港自由行時，要去西貢同南丫島作深度遊。若然強國人一路向西……南，隨時永無寧日；西貢同南丫島嘅居民甚至海鮮，係咪時候諗「移民」？
話說呢篇文章講到，香港好多旅遊業人士擔心，「當遊客遍覽傳統的知名景點如迪士尼、海洋公園之後，香港還有甚麼新的驚喜呈現給他們呢？」認定香港係時候發展「個人深度遊」，建議強國人除咗來港「鳩嗚」，仲應該換個角度打量香港，包括旅客來港時，可以參觀歷史古蹟、遊山玩水，繼而點名大讚西貢同南丫島兩個地方「海鮮很出名」、「島上生活恬靜悠閒」，認為可以推動旅客投身綠色旅遊。
網民推介睇狼英僭建屋
《人民日報》嘅點名行動，形同向港人周末最愛閒逛流連嘅西貢同南丫島，送上「死亡之吻」，所以有網民大鬧官媒「靠害」，亦有網民表明巧京京，慨嘆西貢同南丫島淪陷在即，係時候提前哀悼！
查實要搞深度遊，仲有好多選擇嘅。有網民嘅心水推介，八方都幾like，就係先去狼英官邸同佢嘅僭建舊居行番轉，再去政總圍牆外打手印，繼而到商交所遺址憑弔，最後喺囤地波酒駕路段留下足迹，咁先體會到，狼英治下嘅香港，幾咁有「深度」！
李八方
mailto:[email protected]