【記者白琳報道】民間不合作運動陸續有來，繼學生大罷課，一批社工醞釀發動社福界罷工，為佔中接棒。他們號召同工下周三（24日）請假一天，到添馬公園支援罷課社工學生，同日傍晚商討正式罷工行動。發起人指出，社工深信人人生而平等，拯救被打壓的聲音，決不接受1,200名「人上人」選委操控香港。
「係為咗服務對象福祉」
今次罷工由社工復興運動發起，暫未敲定具體罷工形式。組織成員醒Sir主張「罷工不罷救急」，其間必定維持緊急及性命攸關的服務，例如長期病患及長者的緊急照顧。
一些青少年或長者中心或因罷工受影響。本港社工上一次罷工為07年，其時業界不滿政府一筆過撥款政策，2,000人參與。若今次罷工成事，將是業界首次因社會事件而罷工。
服務弱勢社群是社工天職，醒Sir曾以為緊守工作崗位就能解決社會不公義，「一路做落去先發現，純粹幫人係解決唔到問題，治標唔治本」。他指人大常委為特首選舉落閘，勢必影響民生政策，「冇普選，房屋、扶貧、醫療、勞工都會受影響。就咁講、發聲明，已經唔夠力，要行前多一步。企喺服務對象立場，冇辦法唔做呢個決定（罷工）」。他預期將有一批社工佔中時被捕，業界能以罷工聲援及接力，「想話畀人聽，呢班被捕同工唔係自己攞嚟衰，係為咗服務對象福祉」。
社工復興運動早於年多前為無家者及拾荒者等弱勢社群舉行商討日，另一成員小白說，無家者因沒住址證明而無法投票，聲音永遠不被聆聽，社工正是要凸顯被打壓的聲音，「平凡香港人可能覺得香港都OK，唔會餓死人，有飯食仲想點？但係我見到好多受打壓、排擠嘅人。大家抱住政治中立嘅光環，就等於滅咗佢聲。」
向示威者提供情緒支援
他期望，藉罷工教育服務對象，推動公義社會，「我估佔中好快完，啲人好快拉晒，好快淡忘。𠵱家好多行業互相睇緊頭，如果社工係社會良心，我哋唔介意去牽頭啟動呢件事。就算今次爭取唔到普選，種子已經播下，我哋冇輸過」。
該組織另設兩隊社工隊，分別在佔中現場及示威者被捕後當值，向當事人及家人提供情緒支援，稍後安排心理學家提供訓練，目前已有過百名社工參加。
有興趣加入的社工可於本周五或之前到「社工復興運動」facebook專頁留言。
【動Live】iPhone 6搶先玩，朝9晚5全港巡迴試機
http://bit.ly/liveiphone6