「魔鏡魔鏡，邊個最靚」，童話故事白雪公主相信大家都聽過，其實唔係女人先有妒忌心，男人都有；話說皇家馬德里周一練波備戰歐聯，基斯坦奴朗拿度（C朗）就趕走占士洛迪古斯（J-Rod），唔想同佢一組玩馬騮搶波，唔通因為怕靚靚仔仔嘅J-Rod，搶走佢皇馬第一型男嘅地位？
練習點J-Rod踢後備組
皇馬大軍周一喺練習場備戰，準備周二主場對巴素利嘅歐聯分組賽，教練安察洛堤就安排20名球員各分兩組，準備玩吓馬騮搶波熱吓身，J-Rod心諗自己8,000萬歐元身價，開季幾場都打正選，就梗係黐埋去C朗、加里夫巴利、賓施馬等嘅正選隊度，點知C朗手指指點人頭，發覺自己嗰組有11人，就叫J-Rod去另一組，同艾斯高、查維亞靴南迪斯等後備一齊玩，J-Rod萬分唔願意咁過組，趕走眼中釘後，C朗仲露出勝利嘅偷笑㖭。
其實C朗同J-Rod唔同位，C朗要逼走佢可能都係唔抵得佢咁靚仔。眾所周知C朗係貪靚怪，江湖傳聞半場休息嗰15分鐘，C朗都用大部份時間嚟執靚番個髮型，不過再靚仔，女球迷都有對到慣之時；J-Rod年輕當打，又一副拉丁俊男面孔，加盟第一日已經令馬德里波衫斷市，又點會唔令C朗妒忌。不過話時話，C朗如果逼唔走J-Rod，就倒不如自己走，呢排不斷吹C朗想重返英超，包括母會曼聯、曼城同車路士都想簽佢，周薪仲出到破天荒50萬鎊㖭，咁多人工，想點執靚個樣都得啦。
不過我求大俠就奉勸皇馬唔好搞咁多嘢，專心踢番場好波，聯賽已經兩連敗，俾宿敵巴塞拉開6分，周一球隊收操，巴利揸車離開練習場，因為唔停低幫粉絲簽名，一個男粉絲仲一腳踢向巴利架靚跑車度㖭，有冇踢爛就唔知，但就肯定皇馬迷有好大怨氣嘞！
識睇，一定係睇足英台【英波Live】：
http://soccer.appledaily.com
http://bit.ly/engballlive