噚日一個喺港大搞嘅政改論壇，嘉賓有佔中發起人戴耀廷、立法會議員黃毓民，以及反佔中嘅何濼生、以及建制派嘅青年時事評論員協會副主席陳志豪。台上兩陣對壘，台下就更加惹火，自治、熱血、愛字頭啲支持者都有嚟，台上台下針鋒相對不在話下，但台下不斷插嘴叫囂，令到論壇主持人兼中大學生會會長張秀賢（圖）爆seed鬧人更加係焦點。
話說台下兩派論壇期間不斷高聲叫囂、互數不是，搞到張秀賢要不斷發出警告，但台下罵戰卻繼續升級，按捺不住嘅張秀賢終於頂唔順爆seed，拋下向來溫文形象，厲聲喺會議室內喝罵：「邊個再係咁我就請佢離場！」全場突然靜晒！但平靜時間過得特別快，雙方之後又繼續互罵。首次做論壇主持嘅張秀賢勉強撐到完場，會後話真係相當同情《城市論壇》主持人謝志峰。