珀麗酒店（1189）喺殼王陳國強系統裏面，市值最細隻，得4億幾銀咁大把，集團又持續咁出售主要酒店資產，變得好有可塑性，要贒住。
2009年，珀麗前身仲係叫永安旅遊時，以過8億銀沽出銅鑼灣珀麗酒店。隨後日子，集團亦將主打嘅九龍珀麗酒店同北京珀麗酒店出售（買家逐步科水），而前邊兩間酒店，就繼續以租賃方式經營。
珀麗食住呢幾年酒店業好景，變現酒店資產，話係策略，冇可口非。但咁重要嘅資產都出售，就畀人有輕裝等變身感覺。
估值平絕同業
又殼王系統，旗艦德祥（372），hold咗珀麗、德祥地產（199）、保華（498）。珀麗家陣市值得4.6億銀，其餘保華市值，係珀麗兩倍，而德祥地產市值26億銀，更加係珀麗5.6倍！
珀麗話明，隨住北京珀麗同九龍珀麗出售完成，會派特別股息0.1元。呢撼特別股息嘅息率高達15厘，連埋除息效應計，珀麗市值，縮到得番3.9億元。集團市值，除咗係成系裏面最細奀嘅一隻，亦睇到呢個市值水位，又係搵殼人士嘅心儀size。
咪扯咁遠，珀麗現價（0.71元）PB得0.19倍，殼王旗艦德祥，家陣0.25倍PB、德祥地產0.7倍。珀麗係繼保華之後，系內PB至平選擇。又場內酒店股，富豪REIT（078）家陣0.45倍PB，帝盛（2266）亦都貼佔0.44倍。本地薑酒店股，珀麗PB又係數一數二抵買。
冷灶煲珀麗，當翻半番到1.1元，PB先得0.28倍，未有耐追到行家，市值得7億銀咁大把。
又若果珀麗再持續性派特別股息，市值喺除息效應後，繼續縮水，博變身可能性，應該會越嚟越高。
錢雋
細價股專家
本欄逢周二、三、五刊出