阿里巴巴IPO真的相當成功，招股反應極之熱烈。已入飛的投資者早被告知分貨唔會多，作為下線的14間co-manager更陷入「無咩貨分」局面。阿里sell得，芬佬說有兩大賣點：一、定價有水位，按截稿前未加價計，相當於2015年市盈率24至27倍，比騰訊（700）至少打九折；二、人買我又買，供求緊張下，點都無死錯人。所以，阿里是一宗好的交易（trade）。不過，它同時是否一個好的投資（investment）呢？「唓，講呢啲！」芬佬友人一句，海迪識趣收聲。
當然，單從「炒一轉」來分析，阿里屬必買之選。但如果問到阿里長遠是如何做生意的？你會驚訝業內人士有幾唔同的看法。據業內友人形容，在阿里網站開舖，需要先擺低一舊錢「責死」喺到，近年數期更被拖長，如果你需要錢周轉嗎？阿里會再提供一個有利息的借貸「醒」你。錢，原來是可以咁樣賺返嚟。
而商戶在在淘寶的交易額（GMV）排名有幾高，是可直接影響其未來生意走向，這亦解釋了為何大家會擔心阿里的GMV，是否有機會存在水份。所以，友人說，阿里巴巴是無改錯名的。
阿里上市的確沒有開天殺價，如果它真的可以做到、2015年度盈利超越60億美元的預測。以它最新一季的表現來看，只要維持50至60%增長，即可達標。這應該難不到阿里吧？
海迪