【抗命時代】
「我係邵家臻，我佔中！」30年的民主夢，換來人大反口無情鍘殺，更有「死士」臨陣轉軚，邵家臻卻說得淡然。面對社會荒謬亂局，有說「去飲」也換不來真普選，何必繼續？「如果縮，帶畀社會傷害更大，我哋之前所做嘅每一步，都變得更荒謬」。
記者：馬志剛
「1984年嗰份中英聯合聲明嘅號外，我摺得好整齊，仲喺度」。時光倒流30年，石蔭有間自修室，仍是中學生的邵家臻在溫習，「有位女士突然走入自修室，攞住份號外派畀我哋，話對香港好重要，呢個係歷史」。這是邵家臻對民主最早的憶記。「當時我覺得，我同香港已經唔止係居住關係，我有責任、義務參與」。1989年，八號風球下百萬人大遊行，他也身在其中，「見到香港嘅另一種面貌，當時就覺得行動可以改變意識」。
反國教親證中聯辦介入
大學時代開始參與社運，首次行動即被警方留難，人群散去時有警官上前，指他未經申請牌照使用大聲公，市民、記者即時折返，外籍警官拋下一句「下次唔好」便不了了之，「好荒謬，成個過程由最緊張到最兒戲，只係用咗幾分鐘」。誰又會想到，這種荒謬延續了20幾年。「天星、皇后碼頭、菜園村，拆得好兇狠，新界東北好可能又係咁。問點解要拆，（政府）理由根本講唔通，但手段、力度都係好荒謬」。荒謬之最，要數2012年反國教，「我嗌咪嗌足七日，有晚梁振英私人秘書Scott嚟搵我，話要搵陳惜姿，又話已經唔係香港嘅事，係中聯辦同惜姿開會，唔傾冇得搞」，等同架空港府，直接干預香港事務，「一國兩制瀨咗嘢，吳克儉等官員仲出嚟長篇大論。根本都唔係你揸莊（話事），即係講廢話！」
社會充斥亂象，未來的路只能二選一，「風花雪月遊戲人間；或者反抗絕望、反抗荒謬」，去年4月獲邀參與佔中，未有細想便答應投身死士行列，「人生路行咗一半，我覺得我應該為香港做件實事」。不經不覺，一年多過去，本月初民主夢終於粉碎，他雖難忍淚水，但也開始為佔中作準備，「唔係我哋撩交打，而係我哋冇選擇」。
「三子都唔縮，你縮乜鬼」
堅持佔中，真能扭轉乾坤？「佔中已經唔止為咗改變人大決定，而係為咗喚醒公民毋須認命」。佔中十死士在這年來，有人幾近銷聲匿迹，有人突然倒戈，被問到曾否萌生退意，邵家臻說得灑脫，「我孤家寡人，事業無成，樓都冇買，佢哋（佔中三子）都唔縮，你縮乜鬼？亂世中難得輕身上路，如果要走，我會係最後一個。我係邵家臻，我佔中，有能力咁講，係因為預咗付出代價」。