其實政圈內嘅反狼浪潮，唔係純粹喺泛民主派出現，好似撐中央但唔撐狼英嘅自由黨，就冇被建制派身份局限，不時向狼英發出當頭棒喝！而喺自由黨以外，𠵱家循工業界晉身立法會嘅林大輝，亦不時督促狼英查找不足，唔知係咪因為咁，令自由黨黨魁田少對大輝情有獨鍾，主動表明願意喺下屆立法會選舉，將黨魁甚至新東議席讓畀大輝，似乎好想反狼陣營，後繼有人！
大輝：若政改通過再考慮
上屆立法會喺新界東直選復仇成功重返議會嘅田少，一早話咗2016年會退下火線。冇咗田少嘅自由黨，邊個領軍好？尤其要同狼英作戰，意志必須堅定，田少原來睇中工業界代表林大輝，一嚟可能因為來自唐營同聲同氣，二嚟大輝同田少一樣，支持中央之時唔肯硬撐「冇．料．到」狼英，更不時「提點」狼班子施政。
既然立場相近，田少公然向大輝招手，接受傳媒訪問時話如果大輝願意入黨，佢願意喺下屆立法會選舉新東直選名單排第二，為大輝抬轎，同時願意畀佢接手黨魁㖭！嘩，竟然獲田少高調「示愛」，大輝認真有「飛士」，佢話真係好多謝田少咁有誠意；但係咪接受呢番厚愛？大輝話呀，一切要睇政改方案過唔過到再考慮，事關如果過唔到，立法會拉布不斷，繼續留喺度都冇意思。
但若然政改方案真係過到，大輝話呀，會考慮喺唔同平台參選㗎，換言之都為接手呢支狼牙棒留一線生機！大輝仲寄語泛民唔好否決政改，因為佢哋可以喺特首選舉「造王」。至於有乜嘢橋令政改方案獲通過？佢笑笑口話，如果狼英宣佈政改方案通過後唔參選，唔知有冇賣點呢？八方噚日喺酒會見到狼英，問佢會唔會響應大輝呼籲，透過宣佈唔連任成就政改？可惜佢聽完陰陰嘴笑冇回應。
李八方
mailto:[email protected]