中國大媽好鍾意跳有益身心嘅廣場舞，噚日建行亞洲介紹新制服，似係參考咗呢條跳舞橋，搵來8位年輕嘅前線同事着住新制服大跳「活力健康舞」，背景音樂分別係《龍的傳人》及Ricky Martin首《Livin La Vida Loca》，認真估佢唔到。
據講，8位年輕人跳舞展示新制服，係要畀大家知道新制服幾咁有彈性喎。今日起，建銀分行前線員工會齊齊換上由顧紀筠設計嘅新制服，希望展現既專業又有動感嘅新形象。
新制服最特別之處就係夠靈活，見呢班同事着住制服都可以跳舞，就知件制服幾有彈性，顧紀筠仲專登將條A字裙嘅裙頭改用橡筋頭設計，咁樣女同事食飽飯坐低都唔使箍住晒。
建行常務副行長郭珮芳透露，為新制服與相關活動籌備咗一年，今次有好多同事主動報名參與，但礙於人數所限，最後只係挑選咗台上呢8位同事。見到佢哋跳舞咁投入，郭珮芳都好滿意，仲話估唔到佢哋咁有天份，只係排練咗8至10次咋！