泛民「飯盒會」召集人今日起由公民黨黨魁梁家傑接手，卸任嘅民協馮檢基趁噚日last day特別相約傳媒茶敍，總結過去一年嘅工作。阿基話當初冇諗過做召集人㗎，因為佢過往自覺人微言輕，加上星期五要做Gym，所以上次泛民「六壯士」、即係泛民一人黨議員開會傾邊個做召集人嘅會，佢都冇開，點知大家喺佢缺席就推咗佢出嚟，結果當然係少咗時間做Gym。佢自問表現算稱職，要打分都應該唔低喎，而佢做召集人期間出過嘅聲明突破21份。
前瞻泛民之路，佢認為長遠應該結盟；至於佔中爭取真普選，阿基覺得議員可分批佔中，搵啲留守原有崗位，免得到時個個被拉後，冇人負責發言應對善後等。由於民協得一個立法會議員，所以佢會做佔中先頭部隊。備戰2015年區議會選舉嘅阿基仲話呀，工聯會上屆區選派小花成功突襲李卓人同李永達，今次食過翻尋味，派小花撼佢。