罷課咁大件事，教育局主責官員梗係要回應，但噚日先後開腔嘅卻係前教統局局長李國章以及前教統局常秘羅范椒芬呢對孖寶；等住今日放假嘅現任教育局局長吳克儉，喺上周行貨回應反對罷課後就冇開過金口。
有政界中人噚日見到前教統局孖寶復出唱雙簧，一個嚴詞叫罷課學生索性退學，一個溫婉勸學生發洩後認識國家同各地嘅民主制度，諷指乜時光倒流返去老董年代？佢笑笑口話事件只證明：吳克儉確實好唔掂，冇能力控制大局，先要靠前朝元老幫拖！而呢種由前朝官員出山相助嘅情況似乎越嚟越常見，君不見老董都出嚟推政改。但到底係幫忙定幫倒忙？大家心中有數。