渣打集團（2888）今年初重新劃分業務同埋地區，帶來一連串人事調動，原任渣打銀行（香港）行政總裁嘅洪丕正，4月1日起升任為大中華區行政總裁後，渣打噚日宣佈香港個人金融業務主管禤惠儀將於今年10月1號起，出任大中華區個人銀行客戶部總裁。
外表高貴優雅嘅禤惠儀自1991年加入渣打，佢分別喺產品開發、分行同埋市場推廣等部門擔任不同要職。佢做𠵱家呢個位期間，香港成為個人金融業務表現最出色嘅市場，自2009年起每年度收入都錄得增長，仲成為集團盈利嘅主要貢獻地區，咁好表現抵佢升職喇。工作以外，佢亦有參與渣打嘅義工活動，去中學擔任義務導師，教學生理財。
而禤惠儀原本個位就由現任香港及大中華區個人金融業務分行及銷售主管尚明洋接任。