強國人愛買誠哥樓！根據中原地產研究部統計，上半年最多內地買家買入嘅二手屋苑，首三甲都係長實（001）樓，冠軍係天水圍嘉湖山莊，錄14宗，大圍名城與調景嶺都會噔各錄得10宗，並排第二位。
貪嘉湖平 都會駅方便
買樓向來講location，location，location！係人都知，所以嫌遠嘅港人唔多like天水圍樓，但強國人反而覺得嘉湖山莊「很靠譜唷」，來回內地快，方便來港讀書嘅仔女嘛，最緊要就係價錢方面夠cheap，兼且係十大藍籌最低水嘅屋苑。
大圍名城咁吸引內地客，唔排除想當年長實推盤時，將大圍媲美天安門嘅概念植根內地人腦海。
至於都會駅（Le point），可以解釋係位處港九交滙嘅鐵路盤，家陣唔少代理都仲會用溜口順去sell客：「22步好易到，返工永無遲到，唱K睇戲即到，唔住Le point你走寶！」話知強國人知唔知佢講乜，總之令對方感覺交通方便就sell得。
不過，今次做統計嘅中原地產研究部補充，今次調查係按漢語拼音嘅買家姓名去釐定係內地人。其實唔少港人姓名都用漢語拼音，所以唔排除統計係有偏差。