一位讀者李女士讀到蘋果作者賀越明先生所寫「查大俠的時評」，問文內提及金庸先生所寫的128篇香港的前途，可有單行本出版，在那裏可以買得到？左丁山真係唔知，只知金庸嘅評論文章，倘若結集成書出版，多用明窗出版社出版。請李讀者寫信去俾「明報月刊」總編輯潘耀明先生一問，左丁山幫唔到你，抱歉之至。
老友M睇完九月十一日「香港威尼斯」一文，打電話向左丁山分享佢嘅憂慮：「我心有戚戚然，幾驚香港變成威尼斯，從繁盛商埠變成歷史博物館，專供後人遊覽憑弔。九月十日INYT有一篇報道講跨國大公司發覺不宜在上海北京成立亞洲總部，開始撤離，但唔係搬嚟我地香港喎，而係搬去新加坡，跨國公司在京滬嘅中國部就擴充為中國總部，不隸屬亞洲總部，而係直接向總公司負責。咁香港兩頭唔到岸，跨國公司不來，點做國際城市呀？」左丁山搵番張九月十號INYT睇吓，仲未駛驚住，因為據美國兩大地產租賃顧問公司Jones Lang與Cushman反映，跨國公司搬離京滬、香港，係有跡象，但仲未成為熱潮，佢地嘅中、港、新遷居生意唔係幾旺啫。跨國公司嘅中國生意日益膨脹，一個中國市場等於整個歐洲，冇法子唔留低嘅，一啲跨國公司（MNC）高層好怕中國有「長遠的記憶」，對紐約時報唔敢用真姓名發表意見，只係話「撤離唔可以公開宣佈，只能將負責其他亞洲區業務人員靜靜雞調離過去新加坡，跟住擴充北京嘅中國部。」點解要去新加坡呢，有三大原因，一是新加坡空氣好，外籍人員飽受京滬空氣污染之苦，一拍即合；二是新加坡有充足國際學校學額俾外籍僱員子女就讀，因新加坡政府直情不准新加坡本地學生讀國際學校小學及初中，與外國學生爭位。呢方面，香港輸晒，一間芝加哥公司DHR International（獵頭公司）就指出招聘人才去香港嘅大樽頸就係國際學校冇學額俾外籍學生（因我地香港中產階層霸咗吖嘛）。第三個原因就係東南亞國家經濟發展勢頭良好，印尼係兩億人口民主大國，菲律賓有人口近一億，印菲嘅GDP增長率近年好見得人，越南又話加快開放，所以MNC選新加坡為亞洲（中國以外）總部，有其戰略性。