久未露面嘅煲呔，噚日出席中總國慶酒會時表現好風騷，不停同朋友打招呼；心情甚佳嘅佢，喺台上祝酒後仲大大啖幾乎想飲勝咁滯！
八方唔知點解佢飲得杯落，只知佢喺台上期間，同狼英全場零交流，似乎係道不同不相為謀。雖則心情好，但煲呔堅持不在其位、不謀其政，封嘴唔談政改罷課問題；問佢會唔會跟老董訪京？佢都係笑而不答！
喺酒會上同樣封嘴嘅，仲有民政事務局局長曾德成。有記者噚日問到六七暴動期間係中學生，因為喺校內派傳單反港英政府被捕兼判監嘅佢，對今時今日學生「罷課」有乜回應？被認定係「過來人」嘅曾德成唔想多談，只稱「香港有言論自由」。